அல்கோபர் தமுமுக கிளைக்கு நினைவுக் கேடயம்

அல்லாஹ்வின் திருப்பெயரால்...

உலகில் அதிக இடங்களில் சமுதாயச் சேவை செய்துவருகிறது தமுமுக. அதன் மையில் கல்லாக விளங்கும் சவூதிஅரேபியா கிழக்கு மகாணத்தின் அல்கோபர் கிளை வருடாவருடம் ஹஜ் மாதத்தில் ஹாஜிகளுக்காக சிறப்பான முறையில் இரத்தானம் செய்துவருகிறது. அதை பாராட்டும் விதமாக அல்கோபர் கிங்ஃபகத் மருத்துவமனை அல்கோபர் தமுமுக கிளைக்கு நினைவுக் கேடயம் வழங்கியது. அதை அல்போகர் கிளைச் செயலாளர் சகோ.ஹாஜாபஷிர் பெற்றுக் கொண்டார்.

சவூதிஅரேபியா அராம்கோ மருத்துவமனையில் அல்கோபர் தமுமுக இரத்ததானம்....

அல்லாஹ்வின் திருப்பெயரால்....

கடல் கடந்தாலும் கழகப்பணியை சலைக்காமல் செய்துவரும் தமுமுக கடந்த 26-6-2014 அன்று டெஹரானில் உள்ள அராம்கோ மருத்துவமனைக்கு அவசரத் தேவைக்காக அல்கோபர் தமுமுக இரத்தானம் செய்தது.

மனிதநேயப் பணி

மகாராஷ்டிர மாநிலத்தை சேர்ந்த பெண்கள் உட்பட அப்பாவி மக்கள் 17 பேரை வேலை வாங்கி தருவதாக கூறி திண்டுக்கலுக்கு அழைத்து வந்து ஏமாற்றி அவர்களிடம் இருந்த பணத்தை பறித்து விதியில் விட்டுவிட்டு சில கயவர்கள் சென்றுவிட்டனர் பின் தகவல் அறிந்து தமுமுக வினர் விரைந்து சென்று அவர்களுக்கு உணவு அளித்து பொருள் உதவி செய்து அவர்களை அவர்கள் ஊருக்கு அனுப்பிவைத்தனர் அவர்களுக்காக துஆ செயுங்கள்.

முஸ்லிம்கள் மீது திட்டமிட்டே தாக்குதல் நடத்தப்பட்டுள்ளது: செல்வம் அடைக்கலநாதன்

மோதல்கள் முடிவடைந்த பின்னரும் இலங்கையில் சிறுபான்மை இன மக்கள் நிம்மதியாக வாழ முடியாத நிலை ஏற்பட்டுள்ளதை அளுத்கம, பேருவளைக் கலவரங்கள் வெளிப்படுத்துவதாகவும், அந்த தாக்குதல் சம்பவங்கள் முஸ்லிம் மக்களை இலக்கு வைத்தே நடத்தப்பட்டுள்ளதாகவும் தமிழ்த் தேசியக் கூட்டமைப்பின் பாராளுமன்ற உறுப்பினர் செல்வம் அடைக்கலநாதன் தெரிவித்துள்ளார். 

களுத்துறை மாவட்டத்தின் அளுத்கம மற்றும் பேருவளைப் பகுதியில் இடம்பெற்ற கலவரங்கள் தொடர்பில் கண்டனம் தெரிவித்து அவர் நேற்று செவ்வாய்க்கிழமை வெளியிட்டுள்ள அறிக்கையிலேயே மேற்கண்டவாறு குறிப்பிட்டுள்ளார்.

அவரின் அறிக்கையில் மேலும் தெரிவித்துள்ளதாவது, “சிறுபான்மை மக்களை தொடர்ந்தும் நசுக்கும் நோக்குடன் அளுத்கம, பேருவளை, களுத்துறை பிரதேசங்களில் முஸ்லிம் மக்கள் மீது கட்டவிழ்த்துவிடப்பட்டுள்ள வன்முறைச் சம்பவங்களை தமிழ்த் தேசியக் கூட்டமைப்பு சார்பாகவும், ரெலோ அமைப்பு சார்பாகவும் வன்மையாக கண்டிக்கின்றேன்.

இச் சம்பவத்தினை ஒரு போதும் அனுமதிக்க முடியாது. இது முஸ்லிம் மக்கள் மீது திட்டமிடப்பட்ட வகையில் மேற்கொள்ளப்பட்டுள்ளது. இச் சம்பவத்தின் பின்னணியில் பொதுபலசேனா மட்டுமல்ல, அரசுக்கும் தொடர்பு இருப்பதாகவே சந்தேகிக்க வேண்டியுள்ளது. வன்முறைச் சம்பவங்களையடுத்து ஊரடங்குச் சட்டம் அமுலில் இருந்த போதும்கூட முஸ்லிம்கள் மீது வன்முறைகள் மேற்கொள்ளப்பட்டுள்ளன. இது சாதாரண விடயமல்ல. இலங்கையில் பொலிஸ் பிரிவும் இராணுவமும் என்ன செய்கின்றது?

பயங்கரவாதத்தை முறியடித்ததாக மார் தட்டிக் கொள்ளும் அரசும் அரச படைகளும் வன்முறைச் சம்பத்தை கட்டுப்படுத்த முடியாதவர்களாக இருக்கின்றார்களா? அல்லது வன்முறையின் பின்புலத்தில் இருந்து செயற்படுகின்றார்களா என்பதை முஸ்லிம் மக்கள் புரிந்து கொள்ள வேண்டும்.

இதனால் சிறுபான்மை மக்கள் அனைவரும் ஒன்றிணைந்து ஜனநாயக ரீதியாக தமது உரிமைகளை பெறவேண்டிய சூழ்நிலை உருவாகியுள்ளதையே இது வெளிப்படுத்தியுள்ளது.

எனவே தமிழ், முஸ்லிம் உறவைப் பலப்படுத்தி எமது உரிமைக்காக நாம் தொடர்ந்தும் குரல் கொடுக்க வேண்டியவர்களாக நிர்ப்பந்திக்கப்பட்டுள்ளோம். எங்களுக்குள் ஒரு பலம் அமையும் போதே எங்களை இன்னொருவர் அச்சுறுத்தும் நிலையை நாங்கள் இல்லாமல் செய்யமுடியும்.

இந்த சம்பவம் அளுத்கமையுடன் முடிவடையும் என்று கருதிவிட முடியாது. கடந்த காலத்தில் இந்த நாட்டில் உள்ள பள்ளிவாசல்கள் வர்த்தக நிலையங்கள் மீது தாக்குதல் நடத்தப்பட்டது. இவ்வாறு நடத்தப்பட்ட தாக்குதல்கள் தொடர்பில் என்ன நடவடிக்கை எடுக்கப்பட்டது?

தமிழ்த் தேசியக் கூட்டமைப்பு முஸ்லிம் மக்களுக்காக வீதியில் இறங்கி நீதி கேட்க தயாராகவுள்ளது. எனவே முஸ்லிம் மக்களை பிரதிநிதிப்படுத்துவதாக தெரிவித்து அரசுக்கு முண்டு கொடுத்து பாராளுமன்ற கதிரைகளை சூடேற்றும் அமைச்சர்களும் பாராளுமன்ற உறுப்பினர்களும் அப்பாவி முஸ்லிம் மக்களுக்காக ஒன்றிணைந்து குரல் கொடுக்க வேண்டும்” என்று தெரிவிக்கப்பட்டுள்ளது.

TM

தாமதமான நீதிக்கு என்ன பெயர்?

செய்யாத குற்றத்துக்காகச் சிறையில் வாடும் முஸ்லிம்கள்… அவர்கள் மீது சுமத்தப்படும் பழிகள்...

“இந்த வழக்கு, தேசத்தின் நேர்மை மற்றும் பாதுகாப்பு தொடர்பானது. வழக்கின் தன்மை துயரம்மிக்கது. இத்தகைய வழக்கை இவ்வளவு திறமையற்ற முறையில் புலனாய்வு அமைப்புகள் நடத்தியிருப்பது வேதனையளிக்கிறது. பல உயிர்களைக் கொன்றுகுவித்த உண்மையான குற்றவாளிகளுக்குப் பதிலாக, காவல் துறை அப்பாவிகளைக் கைதுசெய்து கடுமையான குற்றச்சாட்டுகளைச் சுமத்தி, தண்டனை வழங்கக் காரணமாக இருந்துள்ளது...

எனவே, மேல்முறையீட்டாளர்கள் அனைவரையும் விடுதலை செய்கிறோம். அவர்கள் மீதான குற்றச்சாட்டுக் கள் அனைத்தையும் தள்ளுபடி செய்கிறோம்.”

16-வது நாடாளுமன்றத் தேர்தல் முடிவுகள் வெளி வந்த மே 16 அன்றுதான் இத்தீர்ப்பை உச்ச நீதிமன்ற நீதிபதிகள் ஏ.கே. பட்நாயக் மற்றும் இ.கோபால் கெளடா ஆகியோர் அடங்கிய அமர்வு வழங்கியது. 33 பேர் கொல் லப்பட்ட பயங்கரவாதத் தாக்குதல்பற்றிய தீர்ப்பு அது.

அக்‌ஷர்தாம் கோயில் தாக்குதல்

குஜராத் தலைநகர் காந்திநகரில் அக்‌ஷர்தாம் கோயில் மீது 24-9-2002 அன்று தாக்குதல் நடத்தத் தொடங்கிய பயங்கரவாதிகள், அடுத்த நாள் காலை வரை தாக்குதலைத் தொடர்ந்தனர். இதில் 33 பேர் கொல்லப்பட்டனர். 86 பேர் காயமடைந்தனர். இந்தக் கொலைக்கும் தாக்குதலுக்கும் காரணமான பயங்கரவாதிகள் இருவர் சுட்டுக் கொல்லப்பட்டனர்.

பயங்கரவாதிகளுக்கு உதவியவர்கள், அவர்களோடு சேர்ந்து சதி செய்தவர்கள் என்று ஆறு பேர் மீது பொடா சிறப்பு நீதிமன்றத்தில் வழக்குத் தொடுக்கப்பட்டது. அந்த நீதிமன்றம் 1.7.2006 அன்று தீர்ப்பு வழங்கியது. ஆதம்பாய் அஜ்மீரி, அப்துல் கயூம் முஃப்தீசாப் முகமது பாய், சந்த்கான் ஆகியோருக்கு மரண தண்டனையும், முகமது சமிம் ஹனீப் சேக்குக்கு ஆயுள் தண்டனையும், அப்துல்லாமியா யாசீன்மியாவுக்கு 10 ஆண்டுகள் கடுங்காவல் தண்டனையும், அல்ட்டாஃப் மாலீக்குக்கு ஐந்து ஆண்டுகள் கடுங்காவல் தண்டனையும் விதிக்கப்பட்டது.

இத்தீர்ப்பை குஜராத் உயர் நீதிமன்றம் ஜூலை 2010-ல் உறுதிசெய்தது. இதன் மீதான மேல்முறையீட்டின் மீதுதான் தண்டனைகளையும் குற்றச்சாட்டுகளையும் உச்ச நீதிமன்றம் தள்ளுபடி செய்திருக்கிறது. குற்றம் நிரூபணமாகவில்லை என்று நீதிமன்றம் சொல்லவில்லை. மாறாக, இவர்கள் உண்மையான குற்றவாளிகள் இல்லை என்று விடுவித்தும், குற்றச்சாட்டுகளைத் தள்ளுபடி செய்தும் தீர்ப்பளித்துள்ளது.

குற்றச்சாட்டுகளைத் தள்ளுபடி செய்து தண்டனைகளை ரத்துசெய்ததற்கான பல காரணங்களை உச்ச நீதிமன்றம் தனது 281 பக்கத் தீர்ப்பில் கூறியுள்ளது. அதில், ஒரு அம்சத்தை மட்டும் இங்கே குறிப்பிடுவது பொருத்தமாக இருக்கும்.

மரண தண்டனை விதித்ததற்குக் காரணமாக இருந்த வற்றில் முக்கியமானவை என்று பொடா நீதிமன்றம் மற்றும் உயர் நீதிமன்றத்தால் குறிப்பிடப்பட்டவை, பயங்கரவாதிகளுக்கு ‘சதிகாரர்களால்' உருது மொழியில் எழுதப்பட்டதாகச் சொல்லப்பட்ட இரண்டு கடிதங்கள்.

இரண்டு பயங்கரவாதிகளும் குண்டுகளால் துளைக்கப்பட்டுக் கொல்லப்பட்டார்கள். ஒருவர் உடலில் 46 குண்டுகளும், மற்றொருவர் உடலில் 60 குண்டுகளும் துளைத்திருந்தன. அவர்களின் ஆடைகள் முழுவதும் ரத்தமும் சேறுமாக இருந்தது. அப்படி இருந்தபோது அவர்கள் சட்டையில் இருந்த கடிதங்கள் மட்டும் புத்தம் புதிதாக மடிப்புக் கலையாமல் இருந்திருக்கின்றன. இதிலிருந்தே அவை, குற்றம்சாட்டப்பட்டவர்களை வழக்கில் சிக்க வைப்பதற்காகப் பின்னர் சேர்க்கப்பட்டவை என்பது எளிதில் விளங்கும்.

நீதி பிழைத்தது

உச்ச நீதிமன்றம் தீவிர கவனம் செலுத்தாமல் இருந்திருந்தால், நிச்சயமாக மூன்று பேரும் தூக்கிலிடப் பட்டிருப்பார்கள். அவர்களது குடும்பத்தினர்களும் உறவினர்களும் வழிவழியாக ஒதுக்கப்பட்டும், சபிக்கப்பட்டும் வாழ நிர்ப்பந்திக்கப்பட்டிருப்பார்கள். எத்தனை கொடூரமான நிகழ்வு இது. ஆனால், பெரும்பாலான பத்திரிகைகள் இதுகுறித்து ஒரு வார்த்தைகூட எழுதவில்லை. இந்த உண்மை யாருக்கும் தெரியாமலேயே போய்விட்டது.

இப்படி நடப்பது முதல்முறையும் அல்ல. இதுவே, கடைசி முறையாகவும் இருக்கப்போவதில்லை.

8-9-2006-ல் மகாராஷ்டிரத்தின் மலேகானில் நிகழ்ந்த குண்டுவெடிப்பில் 37 பேர் கொல்லப்பட்டார்கள். 125 பேர் படுகாயம் அடைந்தனர். இந்த வழக்கை விசாரித்த மகாராஷ்டிரத்தின் பயங்கரவாத எதிர்ப்புக் குழு மற்றும் சி.பி.ஐ-யால் முஸ்லிம் இளைஞர்கள் 9 பேர் கைதுசெய்யப்பட்டனர்.

2013 வரை ஏழு ஆண்டுகள் அவர்கள் அனைவரும் சிறையில்தான் இருந்தனர். சி.பி.ஐ. விசாரித்து, இந்த ஒன்பது பேரும் குற்றவாளிகள் என்று வழக்கைக் கொண்டுசென்ற பின்னர், எதிர்பாராதவிதமாக இந்தக் குற்றத்தைச் செய்ததாக அசீமானந்தா ஒப்புதல் வாக்கு மூலம் அளித்தார். இதன் பின்னர்தான் அந்த ஒன்பது முஸ்லிம் இளைஞர்களும் வெளியே வந்தனர். இல்லையேல், அவர்களில் சிலருக்குத் தூக்குத் தண்டனை கிடைத்திருக்கக் கூடும். அவர்களது குடும்பத் தினருக்குப் பழிச்சொற்கள் பட்டமாகக் கிடைத்திருக்கும்.

மிகப் பெரிய அவமானம்

இன்னொரு முக்கியமான வழக்கு, ஐதராபாத்தில் மெக்கா மசூதியில் நடத்தப்பட்ட குண்டுவெடிப்பு தொடர் பானது. இந்த வழக்கிலும் பின்னர் குற்றம்சாட்டப்பட்டு ஒப்புதல் வாக்குமூலம் அளித்தார் அசீமானந்தா. அதற்கு முன்னதாக 70 முஸ்லிம் இளைஞர்கள் கைது செய்யப்பட்டுச் சிறையில் அடைக்கப்பட்டனர். அவர்கள் அனைவரும் ஏழு ஆண்டுகளுக்குப் பின்னர் 2013-ல்தான் விடுதலை செய்யப்பட்டனர்.

இந்த மூன்று வழக்குகளும் ஒன்றை வெளிப்படுத்து கின்றன. முதலாவது வழக்கு, குஜராத்தில் நடந்தது. அங்கு பா.ஜ.க. ஆட்சிப் பொறுப்பில் இருந்தது. மலேகான் வழக்கும் மெக்கா மசூதி வழக்கும் காங்கிரஸ் ஆண்ட மாநிலங்களில் நடைபெற்றன. இந்த வழக்குகளை விசாரித்ததில் மாநிலத்தில் உள்ள புலனாய்வுக் குழுக்கள் மட்டுமின்றி மத்திய புலனாய்வுக் குழுவும் ஈடுபட்டுள்ளது. ஆயினும் அந்தக் குற்றங்களில் தொடர்பே இல்லாத 70 பேர், ஆறு ஆண்டுகள் முதல் 11 ஆண்டுகள் வரை சிறையில் அடைக்கப்பட்டிருந்தனர். ஆளும் அரசு என்பதையும் தாண்டி, சிறுபான்மை வெறுப்பு அரசு நிறுவனங்களுக்குள்ளும் புகுந்திருப்பது ஆபத்தான அறிகுறி.

இவர்களில் பெரும்பாலானவர்களின் வயது 25-க்கும் குறைவு. இளமைக் காலத்தின் பொன்னான காலத்தைக் குற்றமேதும் செய்யாமலேயே சிறையில் கழித்துள்ளனர். வெளியே வரும்போது குடும்பமும் சமூகமும் இவர் களைச் சந்தேகத்துடனேயே பார்க்கும். ஒருவேளை இவர்களுக்குத் தண்டனை வழங்கப்பட்டிருந்தால், அவர்களின் சந்ததியும் ‘பயங்கரவாதிகளின் சந்ததி' என்று சமூகத்திலிருந்து விலக்கிவைக்கப்பட்டிருக்கும்.

இந்தியாவில் நீதி வழங்கும் முறைக்கும், ஜனநாயகத்துக்கும் இது மிகப் பெரிய அவமானம். ஆபத்தானதும்கூட. இன்று முஸ்லிம்களுக்கு ஏற்பட்டிருக்கும் இந்த ஆபத்து, நாளை யாருக்கு வேண்டுமானாலும் ஏற்படலாம் என்பதை அனைத்துத் தரப்பினரும் மனதில் இருத்திக்கொள்ள வேண்டியது அவசியம்.

INNERAM

ஈரோட்டில் பாஜகவுக்கு எதிராக உதயமாகியுள்ள மோடி பேரவை- அடிதடி, அலுவலகம் உடைப்பு

ஈரோடு: ஈரோட்டில் பாஜகவினருக்கும், பிரதமர் நரேந்திரமோடி பெயரில் 'மோடி பேரவை' என்ற அமைப்பு நடத்திய கோஷ்டிக்கும் நடுவே தகராறு முற்றியுள்ளது. மோடி பேரவை அலுவலகம் மீதும் தாக்குதல் நடத்தப்பட்டடது. ஈரோட்டில் மோடி பேரவை என்ற பெயரில் அமைப்பு தொடங்கியுள்ள சிலர், பாஜக சின்னமான தாமரை, பிரதமர் மோடியின் உருவப்படங்களை பயன்படுத்திவருகின்றனர். இதையடுத்து, இரு தினங்களுக்கு முன்னர் உள்ளூர் பா.ஜனதாவினர் காவல்துறையில் புகார் ஒன்றை அளித்தனர். அதில், சிலர் பா.ஜனதாவின் பெயரை தவறாக பயன்படுத்தி நிதி வசூலில் ஈடுபடுவதாகவும், அவர்கள் பா.ஜனதா உறுப்பினர்கள் அல்ல என்றும், பா.ஜனதா மாநில தலைமையிடமிருந்தோ அல்லது தேசிய தலைமையிடமிருந்தோ எவ்வித முன் அனுமதியும் பெறாமல் கட்சியின் சின்னத்தையும், பிரதமர் மோடியின் பெயரையும் தவறாக பயன்படுத்துவதாகவும் கூறியிருந்தனர். இந்நிலையில், 'மோடி பேரவை'யின் அலுவலகத்திற்குள் சிலர் புகுந்து அங்குள்ள ஜன்னல் கண்ணாடிகள் மற்றும் மேஜை நாற்காலிகளை அடித்து நொறுக்கிவிட்டு, தப்பிச்சென்றுள்ளனர். தாக்குதல் நடத்தியவர்கள் பா.ஜனதாவினர்தான் என்று கூறப்படுகிறது. இதேபோல மோடி பேரவையை சேர்ந்தவர்கள் வேன் ஒன்றில் சென்றபோது அவர்கள் வழிமறிக்கப்பட்டு கற்கள் மற்றும் கம்புகளால் தாக்கப்பட்டதாகவும், இருப்பினும் டிரைவர் சாமர்த்தியத்தால் அவர்கள் தப்பியதாகவும் போலீசாருக்கு புகார் தெரிவிக்கப்பட்டுள்ளது. இந்த தாக்குதல் சம்பவம் தொடர்பாக இதுவரை யாரும் கைது செய்யப்படவில்லை. இந்த சம்பவங்களால் ஈரோடு பாஜக வட்டாரத்தில் பரபரப்பு நிலவுகிறது.

இலங்கை தூதரகம் முன்பு மாபெரும் முற்றுகைப் போராட்டம்

அளுத்கம- பேருவளை கலவரம்: மத அடிப்படைவாதம் எனும் கருவி!

இலங்கை பல மோசமான விடியல்களைக் கண்டிருக்கிறது. அதுவும், மதவாதமும், இனவாதமும் சேர்ந்து மக்களையும், உடமைகளையும், உரிமைகளையும் வேட்டையாடிய விடியல்களைக் கண்டிருக்கிறது. அப்படியான  அசம்பாவீதத்தின் வடுக்களோடு விடிந்த மற்றொரு காலையிலேயே இன்றைய ‘எமது பார்வையில்’ பகுதியை எழுத வேண்டிய ஏற்பட்டிருக்கிறது.

மேல் மாகாணத்தின் களுத்துறை மாவட்டத்தில் முஸ்லிம்கள் குறிப்பிடளவில் வாழும் அளுத்கம மற்றும் பேருவளைப் பகுதியில் நேற்று ஞாயிற்றுக்கிழமை மாலை ஆரம்பித்த மோதல்கள் கலவரமாக மாறி சில உயிர்களை பலிவாங்கியிருக்கிறது. 80க்கும் அதிகமானோர் படுகாயமடைந்திருக்கிறார்கள். பல வீடுகளும், 10க்கும் மேற்பட்ட வர்த்தக நிலையங்களும் எரியூட்டப்பட்டிருக்கின்றன. அதன் கொந்தளிப்பு கொழும்பின் தெஹிவளையில் இருக்கும் முஸ்லிம் வர்த்தகர் ஒருவரின் மருந்தகத்தை குண்டர் குழுவொன்று அடித்து உடைத்து தீவைக்கும் அளவுக்கு சென்றது.

பொது பல சேனா என்கிற பௌத்த அடிப்படைவாத அமைப்பு பொலிஸாரின் அனுமதியோடு அளுத்கம பகுதியில் நேற்று மாலை ஊர்வலத்தினையும், கூட்டத்தினையும் நடத்தியது. அதன்போதே, பொது பல சேனாவினருக்கும், அப்பகுதி முஸ்லிம் இளைஞர்களுக்கும் இடையில் மோதல் ஏற்பட்டு, அது கலவரமாக மாறியது. இதன்போது,, வெளியிடங்களில் இருந்து அழைத்துவரப்பட்ட குண்டர்கள் அப்பகுதி மக்கள் மீது தாக்குதல் நடத்தியுள்ளதாக பிரதேசவாசிகள் தெரிவிக்கின்றனர்.

“விலை குறைவாக கிடைக்கின்றது என்பதற்காக, முஸ்லிம் கடைகளில் பொருட்களை வாங்க வேண்டாம். ஜனாதிபதி மஹிந்த ராஜபக்ஷவுக்கு மூளை இல்லை. இருந்திருந்தால், முஸ்லிம் ஒருவருக்கு நீதியமைச்சைக் கொடுத்திருப்பாரா?” என்று நேற்றைய கூட்டத்திற்கு தலைமை வகித்துப் பேசிய பொது பல சேனாவின் செயலாளர் கலபொட அத்தே ஞானசார தேரர் குறிப்பிட்டிருக்கிறார். 

பொது பல சேனாவும், செயலாளரான கலபொட அத்தே ஞானசார தேரரும் அரசின் ஆதரவோடு இயங்குகிறார்கள் என்ற குற்றச்சாட்டு பல தரப்பினாலும் தொடர்ந்தும் முன்வைக்கப்பட்டு வருகின்றது. முஸ்லிம்கள் பின்பற்றும் ஹலால் முறைக்கு எதிர்ப்பு தெரிவித்து ஆர்ப்பாட்டங்களை கடந்த ஆண்டின் ஆரம்பத்தில் நடத்தியதன் மூலம் பொது பல சேனா பல தளங்களினதும் கவனத்துக்கு வந்தது. அப்போது அந்த அமைப்பின் அலுவலகமொன்றை பாதுகாப்புச் செயலாளர் கோத்தபாய ராஜபக்ஷ திறந்து வைத்திருந்தார்.

முஸ்லிம்களை பிரதான இலக்காகவும், மற்றைய சிறுபான்மை மதங்களான இந்து, கிறிஸ்தவர்களை பகுதி இலக்காகவும் கொண்டே பொது பல சேனா தன்னுடைய செயற்திட்டங்களை தொடர்ந்தும் முன்னெடுத்து வருகின்றது. அந்தச் செயற்திட்டங்களை சிறுபான்மையினரை அதிகம் கோபத்துக்குள்ளாக்கும் செயற்பாடுகளாகவே இருந்து வருகிறது. பல நேரங்களின் பொலிஸாரை மீறிய அதிகாரத்தைப் பெற்றவர்கள் போல செயற்படுகின்றார்கள். அண்மையில் கூட ஜாதிக பல சேனா என்ற அமைப்பு கொழும்பில் நடத்தவிருந்த ஊடகவியலாளர் மாநாட்டை பலவந்தமாக உள்நுழைந்து பொது பல சேனாவின் பிக்குகள் நிறுத்தியிருந்தனர்.

அடிப்படையில் பொது பல சேனா, பௌத்த மதத்தையும், நாட்டையும் காப்பாற்றுவதே தன்னுடைய இலக்கு என்று கூறிக்கொள்கிறது. ஆனால், அதன் உள்நோக்கங்கள் அல்லது செயற்பாடுகள் மிகமோசமான விளைவுகளை நாட்டில் மீண்டும் ஏற்படுத்தி விடக் கூடும் என்கிற அளவிலேயே இருக்கின்றது.

முஸ்லிம் மக்கள் செறிவாக வாழும் அளுத்கம பகுதில் கூட்டமொன்றை நடத்தி, அங்கு வைத்து முஸ்லிம்களின் அழிவு தொடங்கிவிட்டது என்பது மாதிரியான கருத்துக்களை கலபொட அத்தே ஞானசார தேரர் வெளியிடுகிறார். இது, என்ன மாதிரியான கொந்தளிப்பை முஸ்லிம் சமூகத்தினரிடையே ஏற்படுத்தும்? அதன் விளைவுகள் தெரிந்த நிலையிலேயே இவ்வாறான செயற்பாடுகளை பொது பல சேனா முன்னெடுக்கின்றது என்று நம்ப வேண்டியிருக்கிறது. நாட்டின் மத அடிப்படைவாதம் எல்லாத் தரப்பிற்குள்ளும் புற்றுப்போல பெருகிக் கொண்டேயிருக்கிறது. அதில், பெரும்புற்றுக்கள் வெளியே தெரிய ஆரம்பித்திருக்கின்றன.

முஸ்லிம் மக்களுக்கு எதிரான பொது பல சேனாவின் சட்டத்துக்குப் புறம்பான நடவடிக்கைகளை அரசாங்கம் இன்னமும் கட்டுக்குள் கொண்டு வரவில்லை. அதுவும், இலங்கையின் பிரதான அனைத்து முஸ்லிம் கட்சிகளும் இப்போது அரசாங்கத்தின் பங்காளிக் கட்சிகளாகவே இருக்கின்றன. அதிக தருணங்களில் ஜனாதிபதி மஹிந்த ராஜபக்ஷ தலைமையிலான அரசாங்கத்தை சர்வதேச ரீதியாக முஸ்லிம் நாடுகளே காப்பாற்றுகின்றன. இவ்வாறான நிலை இருக்கின்ற போதிலும், இலங்கையிலுள்ள முஸ்லிம்களுக்கு பாதுகாப்பில்லை என்ற நிலை உருவாகிக் கொண்டிருக்கிறது.

“எனது மக்களை பாதுகாப்பதற்கு தவறிவிட்ட நான், இந்த அரசாங்கத்தில் அமைச்சராக இருப்பதற்கு வெட்கப்படுகின்றேன். எனது மக்களை காப்பாற்ற முடியாத நிலையில், இந்த அரசாங்கத்தில் தான் தொடர்ந்து இருக்கவேண்டுமா?“ என்று அளுத்கம பிரதேசத்திற்கு இன்று திங்கட்கிழமை காலை விஜயம் செய்த சிறீலங்கா முஸ்லிம் காங்கிரஸின் தலைவரும், நீதி அமைச்சருமான ரவூப் ஹக்கீம் தெரிவித்திருக்கிறார்.

அளுத்கம- பேருவளைப் பகுதியில் கலவரம் இடம்பெற்றவேளை ஜனாதிபதியும், பாதுகாப்பு அமைச்சருமான மஹிந்த ராஜபக்ஷ நாட்டில் இல்லை. ஜனாதிபதிக்கு அடுத்து நாட்டின் பாதுகாப்பு விவகாரங்களைக் கையாளும் பாதுகாப்புச் செயலாளரான கோத்தபாய ராஜபக்ஷவும் நாட்டில் இல்லை. இவ்வாறான நிலையிலேயே கலவரம் இடம்பெற்றிருக்கிறது. இது, திட்டமிடப்பட்டு அரங்கேற்றப்பட்டிருக்கிறதா என்கிற சந்தேகமும் எழுகிறது.

இதனிடையே, G77 மாநாடுகளில் கலந்து கொள்வதற்காக பொலிவியா சென்றுள்ள ஜனாதிபதி மஹிந்த ராஜபக்ஷ நேற்றைய கலவரங்கள் பற்றி தன்னுடைய உத்தியோகபூர்வ ருவிட்டர் பக்கத்தில், ”சட்டத்தைக் கையில் எடுப்பதற்கு எவரையும் அரசாங்கம் அனுமதிக்காது. சம்பந்தப்பட்ட அனைத்துத் தரப்பினரையும் கட்டுப்பாட்டுடன் நடந்து கொள்ள வேண்டும். அளுத்கமையில் இடம்பெற்ற சம்பவங்களுக்குப் பொறுப்பானவர்கள் மீது தண்டனையை வழங்குவதற்காக விசாரணை ஒன்று இடம்பெறும்“ என்று எழுதியிருக்கிறார்.

இலங்கையில் சிறுபான்மையின மக்கள் தமது பிரதிநிதிகளை ஒவ்வொரு முறையும் ஏதோவொரு நம்பிக்கையில் தேர்வு செய்து பாராளுமன்றத்திற்கு அனுப்புகிறார்கள். அவர்கள் ஒன்றில் முற்றாக அரசாங்கத்தோடு இணைந்து கொண்டு அடிமைகளாக வலம் வருகிறார்கள். இல்லை, எதிர்க்கட்சியில் இருக்கிறார்கள். அப்போதும், சரியான அரசியலைச் செய்வதில் தெம்பின்றி இருக்கிறார்கள்.

நாட்டின் அரசியலை முன்னெடுத்துச் செல்வதற்கு இங்கு இனப்பிரச்சினையோ, மதப்பிரச்சினையோ தேவையாக இருக்கிறது. ஒவ்வொரு தேர்தலையும் கட்சிகள் அந்த விடயத்தை முன்னிறுத்தியே அணுகுகின்றன. இந்த நிலையில், பெரும்பான்மை அரசாங்கமொன்றை அமைப்பதற்கு இன ரீதியிலான அல்லது மத ரீதியிலான உணர்ச்சி வசப்படுதல்களை முன்னிறுத்த வேண்டிய தேவை அரசியல் தலைவர்களுக்கு இருக்கிறது. அதன், பிரதிபலிப்பாகவே பொது பல சேனா போன்ற அடிப்படைவாத அமைப்புக்களின் எழுச்சியையும், அதற்கான ஆட்சியாளர்களின் அங்கீகாரத்தையும் காண வேண்டியிருக்கிறது!

குஜராத் கலவத்திற்கான கடவுளின் தண்டனை

புதுடெல்லி : குஜராத்தில் முஸ்லிம்களுக்கெதிராக நடந்த கலவரத்துக்காகக் கடவுள் வழங்கிய தண்டனையே பருவமழை பொய்த்தது என நாடாளுமன்ற காங்கிரஸ் உறுப்பினர் அமரீந்தர் சிங் கூறினார்.

தற்போது நடந்து முடிந்த நாடாளுமன்ற மக்களவைத் தேர்தலில், இப்போதைய நிதி அமைச்சர் அருண்ஜெட்லியைத் தோல்வியுறச்செய்து நடாளுமன்ற உறுப்பினரானவர் அமரீந்தர்சிங். அவர் நேற்று மக்களவையில் உரையாற்றும்போது, "தற்போது பருவமழை பொய்த்துள்ளது கடவுளின் தண்டனையால்தான்; 2002 ஆம் ஆண்டு குஜராத் கலவரத்தை நாம் மறந்துவிடக்கூடாது" என்றார்.

Source : Inneram

மாபெரும் முப்பெரும் விழா

இன்ஷா அல்லாஹ் வருகிற 20ஆம் தேதி தொண்டியில் மாபெரும் முப்பெரும் விழா .

1.ஆம்புலன்ஸ் அர்ப்பணிப்பு விழா .

2.இந்த வருடம் அதிக மதிப்பெண் பெற்ற மாணவர்களுக்கு பரிசு வழங்குதல் .

3.சிறப்பான முறையில் மருத்துவ சேவை செய்தவர்களுக்கு நினைவு பரிசு வழங்குதல் .

அனைவரும் கலந்து கொள்ளுங்கள் .

ரியாத்: வீட்டில் டியூசன் சொல்லித் தந்த 3 இந்திய ஆசிரியர்கள் கைது

ரியாத்: பிரத்யேகமாக வீட்டில் வைத்து மாணவர்களுக்கு தனிப்பட்ட டியூசன் சொல்லிக் கொடுத்ததாக குற்றம் சாட்டப்பட்ட மூன்று இந்திய ஆசிரியர்களை ரியாத் போலீசார் கைது செய்துள்ளனர். தனிப்பட்ட முறையில் டியூசன் சொல்லித் தருவது சவுதி அரேபியாவில் பெரும் குற்றமாகக் கருதப்படுகிறது. இந்நிலையில், ரியாத்தில் சுமார் பத்தாயிரத்திற்கும் அதிகமான மாணவர்கள் பயிலும் பிரபல பள்ளி ஒன்றில் கர்நாடகாவைச் சேர்ந்த மெகபூப் பாஸ்தா, தமிழ்நாட்டைச் சேர்ந்த முகம்மது ரிபாய் மற்றும் உத்திரப்பிரதேசத்தைச் சேர்ந்த அஹமத் சித்திக் முதலியோர் ஆசிரியர்களாக உள்ளனர். இந்த ஆசிரியர்கள் மூவரும் தனிப்பட்ட முறையில் வீட்டில் வைத்து மாணவர்களுக்கு டியூசன் சொல்லிக் கொடுப்பதாக போலீசாருக்கு தகவல் கிடைத்தது. அதனைத் தொடர்ந்து சம்பவ இடத்திற்கு விரைந்து சென்ற போலீசார், அங்கு தனிப்பட்ட டியூசன் நடப்பதை உறுதி செய்தனர். அதனைத் தொடர்ந்து ஆசிரியர் மூவரையும் கைது செய்தனர். ஆசிரியர்கள் கைது தொடர்பாக தகவலறிந்த பள்ளி நிர்வாகம் அவசர ஆலோசனைக் கூட்டத்தை கூட்டி இது தொடர்பாக விவாதித்தது. அதன் முடிவில் பள்ளியின் சார்பில் ஆசிரியர்களுக்கு ஜாமீன் கோருவது என முடிவு செய்யப் பட்டுள்ளதாக தகவல்கள் தெரிவிக்கின்றன.

SOURCE : THATSTAMIL

முஹ்ஸின் ஷேக் கொலை - இந்துராஷ்ட்ரிய சேனா தலைவர் கைது!

புனே: இந்து மன்னன் சிவாஜியையும் சிவசேனா தலைவராக இருந்த பால்தாக்கரேயையும் அவமதிக்கும் விதத்தில்

முகநூலில் வெளியான படத்தின் பெயரால் புனேவில் இந்துராஷ்ட்ரியசேனா என்ற உள்ளூர்க் கும்பல் கலவரம் நடத்தியது. அக்கலவரத்தின்போது தகவல் தொழில்நுட்பவியலாளரான முஹ்ஸின் சாதிக் ஷேக் என்ற 28 வயது வாலிபர் அடித்துக் கொல்லப்பட்டார். இக்கொலை மற்றும் கலவரம் தொட்ரபாக இந்துராஷ்ட்ரியசேனாவைச் சேர்ந்த 19 பேர் கைது செயப்பட்டுள்ளனர். இந்நிலையில் இந்துராஷ்ட்ரிய சேனா தலவர் தனஞ்ஜெய் தேசாய் நேற்று முன் தினம் கைது செய்யப்பட்ட்டுள்ளார்.

மதக்கலவரத்தைத் தூண்டிய வன்முறைப் பேச்சுக்கும் அத்தகைய வன்முறைப் பிரசுரங்களை வினியோகித்ததற்கும் புனே காவல்துறை தேசாய் மீது வழக்குப் பதிவு செய்துள்ளது. தனஞ்ஜெய் தேசாய் ஜாமீனில் செல்லாமல் காவலில் இருக்கிறார்.

இவர்மீது ஆட்கடத்தல், பணம் பறித்தல் மற்றும் கலவரங்களில் ஈடுபட்டது உட்பட 23 வழக்குகள் நிலுவையில் உள்ளன. இவர் பிற வன்முறை அமைப்புகளான ராம்சேனாவின் ப்ரமோத் முத்தாலிக், அபிநவ்பாரத்தின் ஹிமானி சவர்க்கார் ஆகியோருடன் தொடர்புடையவர்.

இந்துராஷ்ட்ரியசேனாவைத் தடை செய்வதற்குரிய ஆவனங்களை தயார் செய்து வருவதாக புனே நகரக் காவல்துறை ஆணையர் சதீஷ் மாத்துர் தெரிவித்துள்ளார்.

SOURCE : INNERAM

வங்கிக்கணக்கு மூலம் வாக்காளர்களுக்கு பணம்: தேர்தல் ஆணைய செலவு கண்காணிப்புக் குழு அம்பலம்

தேர்தலின்போது வங்கிக்கணக்கு மூலம் வாக்காளர்களுக்குப் பணம் வழங்கப்பட்டுள்ளதாக தேர்தல் ஆணைய செலவுக் கண்காணிப் புக் குழு தெரிவித்துள்ளது.

தேர்தலில் வாக்காளர்களுக் குப் பணம் கொடுப்பதைத் தடுப்ப தற்கும், கறுப்புப் பணப் புழக்கத்தை கட்டுப்படுத்தவும் வாகன சோதனைகளில் தேர்தல் ஆணைய அதிகாரிகள் ஈடு பட்டனர். அப்போது, காரின் பானட் டிற்குள் ரூபாய் நோட்டுகளை மறைத்து வைத்து எடுத்துச் செல்லப்பட்டதை கண்டறிந்து, அதை அதிகாரிகள் பறிமுதல் செய்துள்ளனர். அதோடு வாக்கா ளர்களின் வங்கிக் கணக்குகளின் மூலமும் பணப்பரிமாற்றம் நடைபெற்றுள்ளது.

தேர்தல் ஆணைய செலவு கண்காணிப்புக் குழுவின் தலைமை இயக்குநர் பி.கே. தாஸ் கூறுகையில் “மொத்தம் ரூ.313 கோடி பறிமுதல் செய்யப் பட்டது. காரின் பானட்டிற்குள் ளும், பஸ்சின் மேற்கூரையி லும் பணத்தை மறைத்து வைத்து எடுத்துச்செல்வதை நாங்கள் கண்டறிந்தோம். இது தவிர, வாக்காளர்களின் வங்கிக் கணக்கிற்கு பணப்பரிமாற் றம் செய்யப்பட்டதை அறிந்து நடவடிக்கை எடுத்தோம். இதேபோல பல நூதனமான முறைகளில் பணப் பரிமாற்றம் நடைபெற்றுள்ளது.

வேட்பாளர்களின் செலவு உச்சவரம்பு ரூ.70 லட்சமாக நிர்ண யிக்கப்பட்டுள்ளது. இதில் 90 சதவீதத் தொகையைக் கூட 80 சதவீத வேட்பாளர்கள் செலவு செய்யவில்லை. பெரும்பாலா னோர் மிகவும் குறைந்த தொகை யைத்தான் செலவு செய்துள்ளதாக கணக்குக் காட்டியுள்ளனர்.

எனவே, வேட்பாளர் செலவுத் தொகைக்கான உச்சவரம்பை உயர்த்த வேண்டும் என்ற கோரிக்கை தேவையற்றது.

வாக்காளர்களுக்குப் பணம் அளிப்பது, மதுவுக்கு பணம் செலவு செய்வது போன்ற செயல்களில் ஈடுபடும் வேட்பாளர்களுக்கு, உச்சவரம்பை எவ்வளவு உயர்த்தி னாலும் அது போதாது என்று தான் கூறுவார்கள்.

மேலும், இதுபோன்ற செலவு களை மேற்கொள்வோர், அவை சட்டவிரோதம் என்று அறிந்து வைத்துள்ளதால், அந்த செலவுத் தொகையை கணக்கில் காட்ட மாட்டார்கள். பெரும்பாலும், கறுப்புப் பணத்தைத்தான் சட்ட விரோதச் செயல்களுக்குப் பயன்படுத்துகின்றனர்” என்றார்.

THANKS : THE HINDU (TAMIL)

முசாபர்நகர் கலவரத்தில் போலீஸ்காரருக்கு தொடர்பு: சிறப்பு புலனாய்வுக் குழு தகவல்

முசாபர்நகர் கலவரத்தில் போலீஸ்காரர் ஒருவருக்கும் தொடர்பு இருப்பது சிறப்பு புலனாய்வுக் குழுவின் விசாரணையில் தெரிய வந்துள்ளது.

முசாபர்நகர் மாவட்டத்தில் பஹாவ்டி கிராமத்தின் கீழ் உள்ள புகானா போலீஸ் நிலையத்தைச் சேர்ந்த போலீஸ்காரர் ஒருவர், கலவரத்தின்போது சட்டத்துக்குப் புறம்பாக உடைமைகளுக்குத் தீ வைப்பதிலும் திருடுவதிலும் ஈடுபட்டார் என்பது கண்டுபிடிக் கப்பட்டுள்ளது.

கலவரக் குற்றங்களை விசாரித்து வரும் சிறப்பு புலனாய்வுக் குழுவின் விசாரணையில் ஏழு பேர் கைது செய்யப்பட்டுள்ளனர்.

இந்த கலவரத்தில் போலீஸ்காரர் உட்பட மேலும் ஐவருக்கு தொடர்புள்ளது தெரியவந் துள்ளது. கடந்த ஆண்டு செப்டம்பரில் உத்தரப் பிரதேச மாநிலம் முசாபர்நகரில் ஏற்பட்ட வகுப்பு கலவரத்தில் 60-க்கும் மேற்பட்டோர் கொல்லப்பட்டனர். ஆயிரக்கணக்கானோர் வேறு பகுதிகளுக்கு இடம்பெயர்ந்தனர்.

Source : THE HINDU (TAMIL)

இராமநாதபுரம் சட்டமன்ற உறுப்பினர் முனைவர் ஜவாஹிருல்லாஹ் அவர்களின் முயற்சியால்....

இராமநாதபுரம் மாவட்டம் ஆற்றங்கரை மக்கள் நீண்ட நாட்களாக தங்களின் வாழ்வாதார அடிப்படை வசதியான சாலை வசதி கூட முறையாக இல்லாமல் அவதியுற்று வந்தனர். அம்மக்களின் துயர் துடைக்கும் வண்ணம் இராமநாதபுரம் சட்டமன்ற உறுப்பினர் முனைவர் ஜவாஹிருல்லாஹ் அவர்களின் முயற்சியால் பாழடைந்த சாலை பவளச்சாலையைப் போன்று சீரமைக்கப்பட்டுள்ளது.

புர்தகேறியில் ஹிந்துக்களால் கட்டப்படும் பள்ளிவாசல்,

இதுதான் நாங்கள், இப்படிதான் தினந்தோறும் வாழ்ந்து வருகிறோம்! என் உயிர் நண்பர்கள் என்று 10 பேரை பட்டியல் இட்டால் அதில் பாதிபேர் எனது ஹிந்து சகோதரர்கள்தான்!

நீ முஸ்லிம், நீ சொல்கிறாய் என்பதற்காக எனது ஹிந்து சகோதரனை நான் எதிரியாய் பார்க்கமாட்டேன், உனக்கு வெறி என்றால் நீ போய் சுவற்றில் முட்டிக்கொள், என்னை அதில் நுழைக்காதே!

நீ சொல்வதையும் முகப் புத்தகத்தில் எழுதுவதையும் பின்பற்றுவதல்ல எனது இஸ்லாம், எனது இஸ்லாம் எனது இறைவனாலும், எனது நபியாலும் எனக்கு தெளிவாக சொல்லிக் கொடுக்கபட்டிருக்கிறது, நான் அதையே பின்பற்றுவேன்!

எனது மார்க்கம் எனக்கு யாரையும் துன்புறுத்த, பயமுறுத்த, பலியெடுக்க சொல்லித்தரவில்லை, அது எனக்கு அழகிய முன்மாத்ரியை, முழு மனித சமுதாயத்துக்கும் நலவையே சொல்லிக் கொடுத்திருக்கிறது, நானும் அதையே பின்பற்றுவேன்!

நாம் அனைவரையும் விட இறைவன்தான் உள்ளங்களை நன்கு அறிந்தவன்! அவனே உள்ளங்களின் ஆட்சியாளன்!

படம் : வடக்குக் கர்நாடகா கிராமமான புர்தகேறி யில் ஹிந்துக்களால் கட்டப்படும் பள்ளிவாசல்,

சுப்ஹானல்லாஹ்!

+2 தேர்வில் 200 க்கு 180 க்கு மேல் கட் ஆஃப் மார்க் வாங்கிய மாணவ/ மாணவிகளுக்கு சேலம் மாவட்டத்தில் உள்ள பல பொறியியல் கல்லூரிகள் இலவசமாக நான்கு வருடமும் கல்வி அளிக்கின்றன. வாய்ப்பை பயன்படுத்திக் கொள்ளுங்கள். 

தொடர்புக்கு. சேலம்  முஹம்மது இஸ்மாயில் (தமுமுக மாணவரணி) 9952256249 

சிறுபான்மையின மாணவருக்கு கல்வி உதவித்தொகை அறிவிப்பு

மதுரை: சிறுபான்மை பிரிவு மாணவர்கள், இந்த ஆண்டுக்கான கல்வி உதவித்தொகை பெறவிண்ணப்பிக்கலாம் என, அரசு அறிவித்துள்ளது.

இந்த ஆண்டு 18 ஆயிரத்து 989 சிறுபான்மை பிரிவு மாணவர்களுக்கு கல்வி உதவித்தொகை கிடைக்கும். முஸ்லிம்கள்8961,  கிறிஸ்தவர்கள்9772,  சீக்கியர்கள் 25, புத்தமதத்தினர் 14, ஜைன மதத்தினர் 215, பார்சி பிரிவினர் 2 பேருக்கு உதவித் தொகைவழங்கப்படும். பிளஸ்1 க்கு மேல்,உயர்கல்வி வரை இந்த உதவித் தொகை பெறலாம். ஒருகுடும்பத்தில் இருவருக்கு மட்டுமே வழங்கப்படும். உதவித்தொகை பற்றிய அறிவிப்பைwww.bcmbcmw.tn.gov.in என்ற இணையதள முகவரியில் காணலாம். விண்ணப்பத்தைwww.momascholarship.gov.in என்ற முகவரியில் பதிவிறக்கம் செய்யலாம். விண்ணப்பிக்ககடைசி நாள் 15.9.2014. ஏற்கனவே கல்வி உதவித்தொகை பெற்று வரும் மாணவர்கள் தங்கள்விண்ணப்பத்தை புதுப்பிக்க கடைசி நாள்10.10.2014.

புனேவில் இஸ்லாமிய தொழில்நுட்ப பணியாளர் கொலையடுத்து, ராஷ்ட்ரீய சேனை அமைப்பிற்கு தடை?

சோலாப்பூரை சேர்ந்த மொசின் ஷேக் (வயது 24) என்பவர் புனேவில் தொழில்நுட்ப பணியாளராக பணிபுரிந்து வந்தார். அவர் திங்கள்கிழமை மாலை தொழுகைக்குச் சென்று திரும்பினார். அப்போதுஇ அவர் மீது திடீரென சிலர் சரமாரியாக ஹாக்கி பேட்களால் அடித்துத் தாக்கினர். அதில் பலத்த காயமடைந்த அவர் பரிதாபமாக உயிரிழந்தார்.

இந்த கொலை சம்பவத்தின் தொடர்புடைய ராஷ்டீரிய சேனை அமைப்பின் உறுப்பினர்கள் 17 பேரை காவல்துறையினர் தீவிரமாக விசாரித்து வருகின்றனர். இவர்கள் மீது கொலைக் குற்றம் உள்ளிட்ட வழக்குகள் பதிவு செய்யப்பட்டன.

இது தொடர்பாக இந்து ராஷ்டீரிய சேனா அமைப்பின் தலைவர் தனஞ்செய் தேசாய் வன்முறையை தூண்டும் வகையில் துண்டு பிரசுரங்களை வினியோகித்ததாக கைது செய்யப்பட்டு உள்ளார்.

இந்த நிலையில் மதவாதத்தை அடிப்படையாக வைத்து வன்முறையை ஏற்படுத்தி அமைதிக்கு பங்கம் வகித்த ராஷ்ட்ரீய சேனை அமைப்பை தடை செய்ய மத்திய உள்துறை அமைச்சகத்தை புனே காவல்துறை ஆணையர் சதீஷ் முத்தூர் நாடி உள்ளார்.

மேலும்இ சமூக வலைத்தளத்தில் இழிவுபடுத்தும் படங்களை கொலையான ஷேக் மொகசின் சாதிக் வெளியிடவில்லை என்றும்இ இது தொடர்பான வதந்திகளை பொதுமக்கள் நம்ப வேண்டாம் என்றும் போலீசார் கேட்டுக்கொண்டு உள்ளனர்.