தமது மதத்தை தனித்தனியே பிரதிநிதித்துவப்படுத்தாது இந்திய தேசியவாதிகளாக மக்கள் தம்மை அறிவித்துக் கொண்டாலே போதுமானது என பிரஸ் கவுன்சில் தலைவர் மார்கண்டேய கட்ஜு கூறியுள்ளார்.
டெல்லியில் பத்திரிகை ஒன்று ஏற்பாடு செய்து இருந்த கருத்தரங்கில் இன்று கலந்து கொண்டு உரையாற்றிய கட்ஜு, "நாம் இந்து தேசிய வாதியாகவோ, முஸ்லீம், சீக்கிய, கிறஸ்தவ தேசிய வாதியாகவோ, இருக்க வேண்டிய அவசியம் இல்லை. நாம் இந்திய தேசியவாதியாக மட்டும் இருந்தால் போதும்.
இந்தியா பல இனம்,பல மக்களைக் கொண்டு அனைவரும் இணைந்து வாழும் நாடாகும். மதசார்பிமை இல்லாமல் இந்தியாவில் ஒருநாள் கூட நல்லபடியாக செல்லாது. மதத்தின் பெயராலும், ஜாதியின் பெயராலும், நாட்டை பிளவு படுத்துபவர்கள்தான், இந்திய தேசியத்துக்கு எதிரானவர்கள்.
இந்து, முஸ்லீம் அல்லது வேறு எந்த இனவாத அடிப்படை சக்திகளும் வேரறுக்கப்பட வேண்டும். பாகிஸ்தான் நோக்கினால், நாம் ஒன்றைப் புரிந்து கொள்ள முடியும். அந்த நாடு இஸ்லாமிய தேசமாக உருவாக விரும்பியதால், அந்த நாடே ஜுராசிக் பார்க் போல காணப்படுகிறது.
பஞ்சாப், சிந்து, பலுசிஸ்தான் மாகாணங்களில் இதைப் பார்க்க முடியும். சில சமயங்களில் பாகிஸ்தான் ஒரு நாடா என்று கூட யோசிக்கத் தோன்றும். ஆங்கிலேயர்கள் இந்து, முஸ்லீம், பிரிவினையை உருவாக்குவதற்காக தனி நாட்டை ஏற்படுத்தினார்கள்.
அனைத்து சமூகத்திலும் 99 சதவிகிதம் பேர்கள் நல்லவர்கள்தான். எனவே, ஒரு குறிப்பிட்ட சமுதாயத்தை தீவிரவாதிகள் என்று முத்திரை குத்தக் கூடாது என்று கட்ஜு பேசியுள்ளார்.
